Alimlər mənfi emosiyaların qan damarlarının vəziyyətinə zərərli təsir göstərdiyini müəyyən ediblər.

Gent.az xarici mətbuata istinadən xəbər verir ki, son tədqiqatlar emosiyaların insan bədəninin qan damarlarının vəziyyətinə əhəmiyyətli dərəcədə təsir etdiyini göstərir. Hətta kiçik bir mənfi emosiya dozası bir neçə dəqiqə ərzində bədəndə mənfi reaksiyalara səbəb ola bilər.

Tədqiqatçılar mənfi emosiyaların qan damarlarının vəziyyətinə necə təsir etdiyini öyrənmək qərarına gəliblər. Təcrübədə ürək-damar sistemi də daxil olmaqla ciddi sağlamlıq problemləri, 2-ci tip şəkərli diabet və ya pis vərdişləri olmayan 18 yaşdan yuxarı üç yüzə yaxın sağlam könüllü iştirak edib.

İştirakçılardan otuz dəqiqə ərzində rahat kreslolarda dincəlmələri istənilib. İlkin məlumatları topladıqdan sonra, könüllülər dörd qrupa bölünüblər: qəzəb, narahatlıq, kədər və neytral.

İlk iki qrupdakı insanlardan onları qəzəbləndirən və ya narahat edən hadisələri xatırlamaları istənib, üçüncü qrupdakılara isə onları kədərləndirən mətn oxunub. Nəzarət qrupunda olanlardan sadəcə birdən yüzə qədər saymağı xahiş ediblər.

Nəticələr göstərib ki, ən böyük dəyişikliklər qəzəbi yaşayanlarda müşahidə olunub. İnsan qəzəblənərək qan axını və ürək-damar sisteminin işinə təsir edən qan damarlarının normal genişlənməsini pozur. Maraqlıdır ki, bu dəyişikliklər ürək və damar sağlamlığına ciddi təsir göstərən qəzəb soyuduqdan sonra qırx dəqiqə davam edir.

Tədqiqatın aparıcı müəllifləri damar funksiyasının pozulmasının infarkt və insult riskinin artması ilə əlaqəli olduğunu və qəzəbin ən zərərli təsirlərə malik olduğunu vurğulayır. Bununla belə, narahatlıq və kədər də az dərəcədə olsa da, qan damarlarının vəziyyətinə mənfi təsir göstərir.